Orania Helpmekaar skep geleenthede om op ‘n gestruktureerde wyse maatskaplike ondersteuning aan die inwoners van Orania te lewer. In samewerking met kerke en ander toepaslike instansies verseker Helpmekaar dat geen gesin onnodig in emosionele, materiële, opvoedkundige of fisieke nood verkeer nie.  

Alle hulp word met groot omsigtigheid deur gekwalifiseerde maatskaplike werkers en bekwame beraders gelewer. Deeglike assessering van die omstandighede van ‘n persoon is byvoorbeeld ‘n absolute voorvereiste om te verseker dat die regte persoon gehelp word en dat hulle dan wel die korrekte, toepaslike hulp ontvang. 

Helpmekaar is, wat die befondsing vir sy werksaamhede betref, geheel en al van die ondersteuning van die gemeenskap afhanklik. Geen staatsondersteuning word ontvang nie. Gelukkig kon Helpmekaar tot op hede, vanweë die aktiewe steun van in- en uitwoners, soos blyk uit die verslag, waardevolle insette op vele terreine lewer. Hierdie hulp maak van Orania ‘n voorbeeld vir ander gemeenskappe deurdat bewys gelewer word van hoe ‘n gemeenskap self verantwoordelikheid vir sy swak en weerlose inwoners aanvaar.